Nú liggja Danir í því.

Eða frekar Glitnismenn. Mái kominn í stjórnarformanns stólinn.

Nú verður heldur betur tekið til hendinni. Hrikalega væri gaman að geta verið fluga á vegg fyrsta stjórnarfundarins.

Þó ég sé nú ekki neinn sérlegur aðdáandi þessara gjafakvótakerfis kalla, þá má Þorsteinn Már eiga það að hann er ekki með neinn rolugangs stjórnunarstíl. Það gengur sem hann tekur sér fyrir hendur. Og ég er hræddur um að það verði tekið til í Glitni.

Annað er stórmerkilegt við þetta. Nú virðist bara vera orðið í lagi (aftur) að kjósa slorkarla í þessar toppstöður. Eru þetta merki um að nú sé verið að leita á náðir reindra rekstrarkarla til að bjarga því sem bjargað verður? Manna sem hafa kynnst einhverju öðru en endalausum uppgangi og hækkunum allra eigna.

Hvar eru öll útrásar-bissness-séníin.

Þóknun til stjórnarmanna Glitnis lækkuð

Fékk þessa óborganlegu sögu senda í dag.

Í þorpi einu birtist einu sinni maður og kvaðst vilja kaupa apa af þorpsbúum á 1000 krónur stykkið.
Þar sem mikið var um apa í nágrenni þorpsins, fóru þorpsbúar að veiða apana og selja manninum þá.
Maðurinn keypti þúsundir apa af þorpsbúum á 1000 krónur, en þegar framboðið fór að minnka, bauðst maðurinn til að borga 2000 krónur fyrir apann. Aftur jókst framboðið um tíma, en síðan minnkaði það enn frekar og hætti síðan alveg þar sem erfiðara var fyrir þorpsbúa að finna fleiri apa til að selja.
Maðurinn tilkynnti þá að hann mundi borga 5000 krónur fyrir hvern apa sem hann fengi, en hann þyrfti að skreppa frá í smá tíma og aðstoðarmaður hans mundi sjá um kaupin á meðan.
Eftir að maðurinn var farinn, hóaði aðstoðarmaðurinn þorpsbúum saman og bauðst til að selja því apana, sem voru geymdir í búrum, á 3500 krónur stykkið. Fólkið gæti svo þegar maðurinn kæmi aftur selt honum apana á 5000 krónur. Þorpsbúar söfnuðu því saman öllu sínu sparifé og keyptu apana af aðstoðarmann inum.
Síðan hefur ekkert spurst til mannsins eða aðstoð armann sins.
 
Núna veistu allt um hvernig hlutabréfamarkaðurinn virkar.

"hvort ástæða væri til að fara í kynningarstarfsemi á íslensku efnahagslífi"

Hér á siðum bloggheima, jafnt sem í fjölmiðlum, koma oft upp afar skemmtileg ummæli manna, jafnt hárra sem lágra. Svo hefur einnig verið í tengslum við "niðurgang" hlutabréfamarkaða undanfarið.

Þessi ummæli, sem virðast höfð eftir Forsætisráðherra, eru ein slíkra ummæla og vekja mig til umhugsunar um það hvort menn séu alveg tengdir jörðinni í þessum málum. Ef rétt er, að það sem ég nota hér í fyrirsögn, hafi verið niðurstaða fundar hálfrar ríkisstjórnarinnar með bankastjórum allra helstu banka landsins, þá undrar mig ekkert að viðbrögð eða viðbragðsleysi ráðamanna, við aðsteðjandi/orðinni kreppu, hafi enginn verið.

Halda menn, og trúa, að það sé hægt að bjarga málunum með því að fara í sameiginlega "kynningarstarfsemi". Halda menn að það sé eitthvað svo vel falið og óljóst um íslensk efnahagsmál að það eitt sé ástæðan fyrir neikvæðri sýn erlendra aðila á málin? Eða hvað er það í rekstri íslenskra fyrirtækja, sem skráð eru á markað, sem er öðrum hulið? Gefa þessi fyrirtæki ekki út, allar þær upplýsingar sem skylt er og krafist, eins og annarra þjóða fyrirtæki á markaði.

Eigum við ekki bara að viðurkenna að þessi dökka mynd sem dregin er upp í erlendum fjölmiðlum, og okkur þykir svo óréttlát og teljum vera vegna öfundar, er til kominn vegna þess sem vitað er um íslenskt efnahagslíf. Auðvitað geta menn misreiknað sig og birt eitthvað sem kostar þá skaðabætur, en ég fullyrði að enginn erlendur fjölmiðill hefur misreiknað sig jafn hrapalega og greiningadeildir íslensku bankanna hafa gert síðustu mánuði. Og ég man eftir ummælum eins af aðalbankastjórum íslensks banka sem sagði á fyrstu dögum nýliðins janúar að hann teldi að hlutabréf myndu hækka um 20% að meðaltali á árinu 2008. Skyldi hann þurfa að borga skaðabætur, gangi spáin ekki eftir.

Erlendir fjölmiðlar og viðskipta-greinendur vissu um hring-eigna-tengsl fyrirtækja í íslensku Kauphöllinni og vöruðu við, að það gæti leitt til "dómínokubba" hruns þegar til lækkunar kæmi.

Erlendir aðilar vissu hve hátt hlutfall Íslensku Úrvalsvísitölunnar eru fyrirtæki sem einungis græða á því að hlutabréf hækki, hafa jafnvel enga aðra tekjuinnkomu. Þeir vöruðu við því að illa gæti farið og Íslandsmet sett í taprekstri.  Hvernig halda menn að útkoma þeirra fyrirtækja verði á þessu ári, sem einungis hafa tekjur af því að selja hlutabréf á hærra verði en þau voru keypt á.

Erlendir greinendur vissu hve skuldsett útrás íslendinga var, og þurfa ekki neinar viðbótar upplýsingar til að breyta áliti sínu, nú þegar kreppan er skollin á.

Barnaskapur eins og að halda því fram að hátt Skuldatryggingaálag íslenskra banka sé til komið vegna skorts á upplýsingum, eða því að þeim sé refsað fyrir að vera íslenskir er ótrúlegur.  Skuldatryggingaálagið er nákvæmlega eins hátt og menn telja að áhættan sé, og til að meta þá áhættu hafa þeir allar upplýsingar sem þarf. Sé það hærra en almennt hjá evrópskum bönkum, þá er það vegna þess að áhættan er meiri.

Fólk er svo blátt að það lætur út úr sér að öfund ein ráði ferð danskra blaða og þeir þoli ekki að íslenskir auðmenn séu að kaupa upp allar fasteignir í Kaupmannahöfn. Samt var fasteignafélagið, sem mikið var í fréttum vegna þess að það hýsti nokkur dönsk ráðneyti, og íslenskir aðilar keyptu, áður í eigu dótturfélags General Motors. Slíkt er alþekkt í t.d. Danmörku og ekki beinlínis eins og fyrstu erlendu fjárfestarnir sem komu þangað hafi verið íslenskir.

Og ekki voru ummælin fyrir þennan fund gáfulegri en eftirmælin. Þar var haft eftir Forsætisráðherra að af hálfu ríkisstjórnarinnar væri hafinn undirbúningur "til að draga úr neikvæðum afleiðingum hugsanlegrar lánsfjárkreppu á áþjóðamörkuðum".  Velkominn heim Geir minn! Hvernig var mannlífið þarna í Langtíburtulandi þar sem þú virðist hafa dvalið síðustu mánuðina. Voru menn þar á hlaupum til að reyna að koma út lánsfé, sem enginn vildi.

Kreppan er komin. Menn geta talað og bullað og reynt allt sem þeir vilja. Hangið á bakkanum og neitað að fara utar í laugina. Það breytir þó ekki því að best væri að spyrna sér bara strax í bakkann og leggja í sundferðina yfir, þó vatnið sé bæði kalt og gruggugt.

Ekkert breytir því að við verðum að synda yfir, ég er farinn af stað.

 

 

 

Ræddu stöðu á fjármálamarkaði

Framsetning hlutanna.

Það verður að teljast frekar undarleg ráðstöfun blaðamanns ST að setja spurningamerki aftan við þessa spurningu, eða m.ö.o að setja greinina fram í spurnarformi. Flestir þeir sem fylgst hafa með, undanfarin misseri, ættu að vita að leiðin hefur heldur legið niður á við þó svo ekki sé dýpra tekið í árinni. Það eina sem skýrt gæti spurnarformið er ef þeir hafa tekið með í reikninginn verðlagið eða vextina sem þjóðfélagið býr við.

Það verður einnig að teljast verulega undarlegt, þegar menn eru enn að velta því fyrir sér hvort kreppa sé í aðsigi, nú þegar hlutabréfaverð hefur snar fallið. Getum við þar tekið dæmi að íslenska Úrvalsvísitalan hefur fallið um 35% á síðustu sex mánuðum (8409/5463) sem er að sjálfsögðu bara meðaltal, en innan hennar eru fyrirtæki, og þar helst fjármálastofnanir, sem  hafa fallið enn meira. (Spron -58,8% 16,7/6,87) (Exista -61% 36,15/14,22) Til að gæta sanngirni er þó rétt að taka fram að hér eru verstu dæmin sem finna má tilgreind, en á móti að ekki er miðað við hæsta gengi síðasta árs.

Fyrir mér er kreppan nú þegar skollin á. Ég er fyrir löngu farinn að spá í hvernig ég get varið mig og mína fjölskyldu, fyrir afleiðingum hennar, sem birtast munu okkur á næstunni. Ég velti fyrir mér hvernig sá þáttur atvinnulífsins, þar sem ég hef megnið af mínum tekjum, mun koma út úr samdrættinum og hvort ég geti gert ráðstafanir til að minnka áhrifin á lífsafkomu mína. Ekki á ég nú beinlínis von á að vextir fari lækkandi og þá ekki verðlag á neysluvöru.

 Kannski er þetta bara í eðli mínu þar sem ég hef alla mína tíð þurft að gera ráð fyrir hinu versta. Ég hef aldrei leift mér að bregðast ekki við veðurspánni, en það segir ekkert um að ég geti ekki efast um að spáin sé rétt. Afleiðingarnar, ef ég geri ekkert, geta bara einfaldlega orðið of afdrifaríkar til að forsvaranlegt geti talist að bregðast ekki við.

En svona sjálfsögð jarðtenging virðist ekki vera til staðar hjá þeim sem fremstir hafa farið í fjármálageiranum undanfarið. Menn hunsa bara vondu veðurspána og álíta, því þeir voru einu sinni heppnir og brælan sem spáð var kom ekki , að þá muni aldrei blása framar.

Viðbrögð þeirra sjáum við núna. Uppgjör eignarhaldsfélaganna birtast nú hvert af öðru. Erlendir aðilar hafa margir dregið upp dökka mynd og bent á að stefnið á dallinum sé helst til láreist til að þola þá öldu sem framundan er. En okkar menn eru ekki af baki dottnir. Framan á trýnið klambra þeir ótrúlegum fúaspýtum. Getum við þar t.d. nefnt einkar verðmæta "VIÐSKIPTAVILD" eða jafnvel "eigið mat á eignasafni" sem er út úr kortinu miðað við verð á skráðum markaði.                             Allt einkar hentugar aðferðir til að hala upp eiginfjárstöðuna, þó naglhaldið sé lítið.

Ég geri mér ekki grein fyrir því hverja þessir menn eru að reyna að blekkja. Kannski eru þeir að reyna að halda andlitinu svolítið lengur? Að sjálfsögðu eru athugasemdirnar sem koma frá erlendum aðilum svo bara öfund.!

En í morgunsárið fáum við að sjá hvernig til tókst.  Hverjir trúa því að "um tímabundna lækkun markaðarins sé að ræða" og því í lagi að ákveða sitt eigið verð á eignirnar.  Laumulegur afsláttur á hlutabréfum til ákveðinna kaupenda hlýtur líka að vekja traust þeirra sem eiga hin bréfin, um að allt sé í lagi, eða hitt þó heldur.

Áfram skal haldið. Reynt til hins ýtrasta að halda loftinu í blöðrunni. Allt á sér rætur í húsnæðisvanda og ofneyslu vestanhafs en enginn vill kannast við að nákvæmlega sama staða sé upp hér á klakanum. Hér gefur fjármálastarfsemin svo mikið af sér að við búum nánast við ónæmt hagkerfi!

En förum bara að horfast í augu við staðreyndir. Það er komin kreppa.

Ég ætla að halda áfram að hlusta á veðurspána.

 

Er allt á niðurleið á Íslandi?

Samningaviðræður?

 "hljóti að hafa vitað"

Þetta er snjall náungi.

 Hann passar sig á því að segja ekki of mikið, en hótar yfirmönnum bankans því að ef upphæðin sem hann fær fyrir að taka á sig alla sökina verði ekki nógu há, þá geti hann gert verulegan usla.

Þegar hann verður sáttur, og upphæðin verður komin inn á svissnesku bankabókina, þá játar hann allt og situr inni í svona u.þ.b 1,5 - 2 ár. Eftir að hann kemur út úr hvítflibba fangelsinu verður hann á grænni grein út lífið.

Maðurinn er í þannig aðstöðu að hann getur ekki tapað.

Yfirmenn „þóttust ekki sjá“

Helvítis vesen:

Þeir sem lögðu svo mikið á sig til að klína þessu á verðbréfamiðlarann.

Ég dreg til baka það sem ég skrifaði einhverstaðar hér neðar í blogglistanum að það hefði líklega ekki gengið að klína þessu á Asíska skúringakonu bankans, því hefði enginn trúað.  Þeir hefðu kannski átt að reyna það, miðað við hve auðtrúa fjölmiðlar og almenningur hafa verið að undanförnu.

Að lágt settur verðbréfamiðlari geti skuldsett bankann um hærri upphæð en sem nemur eigin fé hans, án vitneskju annarra starfsmanna, er bara algerlega glórulaus.

Er framkvæmdastjóri innra eftirlits bankans enn við störf.

Sarkozy vill reka forstjórann

Fólk er fljótt að gleyma.

Það virðast engin takmörk fyrir því hve fólk getur verið fljótt að gleyma því sem á undan er gengið. Nú er byrjaður enn og aftur grenjuvæll aðila sem einu sinni voru í sigurliðinu en eru skyndilega farnir að tapa.

Síðustu fimm árin eða svo hefur þó vælið tekið á sig grátbroslegri mynd en fyrr. Byggðarlögin sem áður sópuðu  til sín veiðiheimildum annarra staða, eru nú komin í vörn, og reka þá upp kvein sem sennilega á að verða til þess að þeim verði vorkennt. Mig rekur ekki minni til þess að bæjarstjórn Akurnesinga hafi stormað á fund suður í Sandgerði með þingmenn og ráðherra í eftirdragi þegar HB flutti Miðnes með húð og hári upp á Skipaskaga. Þar með nánast allar veiðiheimildir Sandgerðis.

En þetta er bara saga kvótakerfisins. Enginn vorkenndi Ísfirðingum þegar Samherji hirti af þeim stoltið sjálft, Guðbjörgina, því þeir voru ný búnir að safna að sér öllu frá Þingeyri, Flateyri og Súðavík.

Enginn vorkenni svo Akureyringum þegar Guðmundur Kristjánsson keypti ÚA og mér er alveg fyrirmunað að vorkenna Akurnesingum því ég veit ekki hve mikið hlutfall vorkunnarinnar á að fara út í Sandgerði. Einhvernvegin minnir mig í meirihluta Bæjarstjórnar Akraness sitji sá flokkur sem harðast hefur gengið fram í að verja núverandi fiskveiðistjórnunarkerfi. Þeir sjá kannski eftir stuðninginum núna.

En hverjir eru svo næstir. Einhvernvegin grunar mig að í þessari aðstöðu gæti næstir lent, bæjarstjórar sem farið hafa mikinn undanfarið í að verja núverandi fiskveiðistjórnunarkerfi. Ekki kæmi það mér á óvart þó að í veði fyrir ákveðnu illa stöddu fjárfestingafélagi væri talsvert af kvóta Vestmannaeyinga. Það er hroðalegt að lífsviðurværi íbúa sjávarbyggða geti verið í hættu, ef kvótahafinn (oft einn aðili) fer að spila fjárhættuspil á hlutabréfamarkaði.

Ég vorkenni bara þjóðinni.

 

Svartur dagur í sögu Akraness

Skoðanakönnun!

"Rétt upp hend" þeir sem trúa því að einn maður geti verið valdur að þessu öllu.

Alveg er það magnað, kjaftæðið sem bankageiranum dettur til hugar að láta frá sér nú á tímum. Svo skilja þeir ekkert í því að almenningur og þá helst fjárfestar skuli vera búnir að missa trúna á dótinu. Svo SPÁ fjölmiðlar í að bankastjórinn missi jafnvel vinnuna!!!!

Að saka einn starfsmann um að vera einn og sér, og með svikum, valdur að 5 milljarða EURO tapi segir mér bara hve allt sem þessi geiri atvinnulífsins lætur frá sér er vafasamt og ótrúverðugt. Það er auðvitað mun betra fyrir alla, sem hagsmuni hafa af, að saka einn mannræfil um athæfið heldur en að viðurkenna að bankinn hafi gert í buxurnar í viðskiptum.  Verst að geta ekki pikkað upp Asíska skúringakonu því þá yrði sagan helst til lygileg.

Ef hins vegar þessi saga er sönn, og einn maður getur gert svona, án vitneskju annarra innan bankans, þá er nú ekki beysin stjórnunin á fyrirtækinu. Ég held því að fyrir allt hugsandi fólk skipti engu máli hvernig þessi banki setur málið fram, og almenningur í Frakklandi ætti að drífa sig og taka peningana sína út, áður en þeir tapa restinni.

En þetta er sennilega það sem er að í viðskiptalífi vesturlanda núna, og veldur "titringinum/hruninu" að undanförnu. Lygarnar og einimakkið er orðið svo mikið að það dettur ekki nokkrum manni í hug að hætta sínum peningum í þessa hít. Eftir allt talið um hve upplýsingagjöfin er mikilvæg fyrir svona opinn markað, þá keppast allir við að halda öllu leyndu sem hægt er.

Besta dæmið hér á landi er kapp bankanna um að tala af sér Gnúp.  Enginn vill svo mikið sem kannast við að vera viðskiptabanki þessa félags. Hvað þá upplýsa hver staðan á Gnúp raunverulega er.

Svo skilja greiningadeildirnar ekkert í því að fólk skuli ekki vera tilbúið að leggja fé sitt að veði og hundskamma bara fjölmiðla sem flytja fréttir af "gróusögunum" sem ganga í samfélaginu, einu fréttunum sem fáanlegar eru.

Í mál við verðbréfaþrjótinn

Fyrsta skrefið í yfirtöku?

Ef ég skil þetta rétt þá hafa Kaupþingsmenn samið við Landsbankamenn að hjálpa sér við að reyna að halda uppi verðinu á hlutafé í Kaupþingi.

"í því skyni að markaðsverð skapist á hlutabréfunum og verðmyndun verði með skilvirkum og gagnsæjum hætti"

Þá semsagt vitum við það að það er ekkert markaðsverð á hlutabréfum í Kaupþingi og Íslenska Kauphöllin er mjög óskilvirk og ógagnsæ.

Þá er sem sagt Landsbankinn búinn að lofa að kaupa í KÞ fyrir 400 millur á dag, (og reyna að selja í KÞ fyrir sömu upphæð, en ég veit nú ekki hvernig það mun ganga) þannig að það tekur ekki margar vikur fyrir LÍ að eignast Kaupþing.

Ég spái því að LÍ verði búnir að yfir taka Kaupþing fyrir vorið. Þ.e ef Kaupþing lifir þangað til.

En ég spáði nú líka að Íslendingar myndu valtra yfir Frakka í gær, svo þið skuluð ekkert taka mark á mér.

Kaupþing semur við Landsbanka um viðskiptavakt

Framgangur frjálshyggjunnar.

Hann tekur á sig ótrúlegar myndir, framgangur frjálshyggjunnar.

Þegar þetta efnahagsstjórnunar kerfi sem vesturlönd hafa búið við síðustu árin verður gjaldþrota þá er strax kallað á hið opinbera til aðstoðar.  Ekki beinlínis að þessi aðgerð sé sú fyrsta, því seðlabankar hafa undanfarið dælt fjármagni inn í hagkerfið til að reyna að halda í því tórunni. 

En miðað við viðbrögð markaðarins þá virðist þetta vera það eina sem fjárfestar hafa trú á, núorðið, því bréfin í Northen hækkuðu strax og ríkisábyrgðin var kunngerð.

Sem sagt. Fjárfestar frjálshyggjukerfisins hafa mesta trú á að festa peningana sína í opinberum félögum, ríkisfyrirtækjum.

Ég held að það verði að kalla á Hannes Hólmstein til að skýra þetta út fyrir okkur.

En ég er alveg öruggur með allar mínar bankainnistæður, og get tekið þær út með vöxtum, strax og ég þarf á þeim að halda, hvenær sem það verður.  

Hlutafé BLÓÐBANKANS hefur ekkert fallið.                                           

Northern Rock gefur úr ríkistryggð skuldabréf