Framsetning hlutanna.

Það verður að teljast frekar undarleg ráðstöfun blaðamanns ST að setja spurningamerki aftan við þessa spurningu, eða m.ö.o að setja greinina fram í spurnarformi. Flestir þeir sem fylgst hafa með, undanfarin misseri, ættu að vita að leiðin hefur heldur legið niður á við þó svo ekki sé dýpra tekið í árinni. Það eina sem skýrt gæti spurnarformið er ef þeir hafa tekið með í reikninginn verðlagið eða vextina sem þjóðfélagið býr við.

Það verður einnig að teljast verulega undarlegt, þegar menn eru enn að velta því fyrir sér hvort kreppa sé í aðsigi, nú þegar hlutabréfaverð hefur snar fallið. Getum við þar tekið dæmi að íslenska Úrvalsvísitalan hefur fallið um 35% á síðustu sex mánuðum (8409/5463) sem er að sjálfsögðu bara meðaltal, en innan hennar eru fyrirtæki, og þar helst fjármálastofnanir, sem  hafa fallið enn meira. (Spron -58,8% 16,7/6,87) (Exista -61% 36,15/14,22) Til að gæta sanngirni er þó rétt að taka fram að hér eru verstu dæmin sem finna má tilgreind, en á móti að ekki er miðað við hæsta gengi síðasta árs.

Fyrir mér er kreppan nú þegar skollin á. Ég er fyrir löngu farinn að spá í hvernig ég get varið mig og mína fjölskyldu, fyrir afleiðingum hennar, sem birtast munu okkur á næstunni. Ég velti fyrir mér hvernig sá þáttur atvinnulífsins, þar sem ég hef megnið af mínum tekjum, mun koma út úr samdrættinum og hvort ég geti gert ráðstafanir til að minnka áhrifin á lífsafkomu mína. Ekki á ég nú beinlínis von á að vextir fari lækkandi og þá ekki verðlag á neysluvöru.

 Kannski er þetta bara í eðli mínu þar sem ég hef alla mína tíð þurft að gera ráð fyrir hinu versta. Ég hef aldrei leift mér að bregðast ekki við veðurspánni, en það segir ekkert um að ég geti ekki efast um að spáin sé rétt. Afleiðingarnar, ef ég geri ekkert, geta bara einfaldlega orðið of afdrifaríkar til að forsvaranlegt geti talist að bregðast ekki við.

En svona sjálfsögð jarðtenging virðist ekki vera til staðar hjá þeim sem fremstir hafa farið í fjármálageiranum undanfarið. Menn hunsa bara vondu veðurspána og álíta, því þeir voru einu sinni heppnir og brælan sem spáð var kom ekki , að þá muni aldrei blása framar.

Viðbrögð þeirra sjáum við núna. Uppgjör eignarhaldsfélaganna birtast nú hvert af öðru. Erlendir aðilar hafa margir dregið upp dökka mynd og bent á að stefnið á dallinum sé helst til láreist til að þola þá öldu sem framundan er. En okkar menn eru ekki af baki dottnir. Framan á trýnið klambra þeir ótrúlegum fúaspýtum. Getum við þar t.d. nefnt einkar verðmæta "VIÐSKIPTAVILD" eða jafnvel "eigið mat á eignasafni" sem er út úr kortinu miðað við verð á skráðum markaði.                             Allt einkar hentugar aðferðir til að hala upp eiginfjárstöðuna, þó naglhaldið sé lítið.

Ég geri mér ekki grein fyrir því hverja þessir menn eru að reyna að blekkja. Kannski eru þeir að reyna að halda andlitinu svolítið lengur? Að sjálfsögðu eru athugasemdirnar sem koma frá erlendum aðilum svo bara öfund.!

En í morgunsárið fáum við að sjá hvernig til tókst.  Hverjir trúa því að "um tímabundna lækkun markaðarins sé að ræða" og því í lagi að ákveða sitt eigið verð á eignirnar.  Laumulegur afsláttur á hlutabréfum til ákveðinna kaupenda hlýtur líka að vekja traust þeirra sem eiga hin bréfin, um að allt sé í lagi, eða hitt þó heldur.

Áfram skal haldið. Reynt til hins ýtrasta að halda loftinu í blöðrunni. Allt á sér rætur í húsnæðisvanda og ofneyslu vestanhafs en enginn vill kannast við að nákvæmlega sama staða sé upp hér á klakanum. Hér gefur fjármálastarfsemin svo mikið af sér að við búum nánast við ónæmt hagkerfi!

En förum bara að horfast í augu við staðreyndir. Það er komin kreppa.

Ég ætla að halda áfram að hlusta á veðurspána.

 

Er allt á niðurleið á Íslandi?

Athugasemdir

[Promotor Fidei, 3.2.2008 kl. 23:41]

Ég held þú sért óþarflega svartsýnn. Vissulega hefur komið bakslag, en það étur ekki upp það sem hefur áunnist síðustu árin.

Hagnaður fjármálafyrirtækjanna er ekki eintóm froða, þó vitaskuld standi þeir ekki á sama rótstabíla grunninum sem bankar í Evrópu gera, og hafa safnað upp með 100-200 ára starfsemi.

Framtakssemi og fjárfestingavit hæfra manna losnaði úr læðingi með einkavæðingu bankanna. Það má líkja því við að spennunni sé sleppt af gormi sem hefur verið herptur saman. Nú er gormurinn væntanlega búinn að teygja úr sér að fullu, og vaggar aðeins upp og niður á meðan hann nær jafnvægi. -Hann fer samt ekki a skreppa aftur saman í það sem áður var.

Þá má því bæta við að svo virðist sem mörg fjárfestingafélögin séu um þessar mundir að skila skýrslum um hagnaði upp á milljarða og tugmilljara. Það er því væntanlega nægur forði í búrinu til að þrauka á meðan stormurinn gengur yfir.

[Sveinn hinn Ungi (IP-tala skráð) 4.2.2008 kl. 16:11]

Algjörlega sammála þessum pistli. Þeir reyna að kjafta upp bréfin eins lengi og þeir geta. Dæmi um þetta er skýrsla FL-group á 3. ársfjórðungi 2007. Þar segir m.a.:

"Fjárhagsstaða sterk og rekstur stærstu eigna félagsins góður ""Heildareignir jukust um 40,5% á fyrstu níu mánuðum ársins""Fjárhagsstaða og fjárfestingageta er áfram góð"ATH þetta er um það leiti sem félagið þurfti neyðaraðstoð til að hægt væri að halda því á löppunum, í nóvember byrjun. 

[Sveinn hinn Ungi (IP-tala skráð) 4.2.2008 kl. 16:26]

Orðrétt er haft eftir Hannesi Smárasyni í skýrslunni:

"FL Group er vel í stakk búið til frekari vaxtar,
þar sem áfram er lögð áhersla á vel skilgreinda fjárfestingastefnu með það
markmið að nýta vel áhugaverð tækifæri á markaði"

Á þessum tíma var félagið að þrotum komið. Flest markaðsbréf voru síðan seld næstu vikurnar og Jón Ásgeir og Fons mokuðu eignum inn í fyrirtækið til að bjarga því. Sem sagt; ekkert að marka neitt.