Að finna sökudólg.

Ég ætla helst að hafa sem fæst orð um þessa greiningu frá Glitni enda fer maður hálfvegis hjá sér yfir því að þetta fólk skuli ekki sjá það sjálft að þau ættu að láta lítið fyrir sér fara á næstunni.        En ég er nú heldur ekki viðskipta "sér"fræðingur.

En sem siglingafræðingur þá myndi ég láta það ógert að kalla í öll skipin í kring og segja þeim hvert best sé að stefna, þegar ég væri sjálfur búinn að sigla í strand. Og tala nú ekki um ef búið var að reyna að vara mig við skerinu.

En það er annað sem er farið að fara verulega í taugarnar á mér, og það er setningin sem nánast er orðin að viðhengi með öllum fréttum í dag, af efnahagsmálum heimsins, "um tapið af húsnæðislánum í Bandaríkjunum"

Eigum við að trúa því að það eina sem að sé í "heimsefnahagnum" sé það að einhver hópur efnalítilla lántakenda í Bandaríkjunum geti ekki borgað lánin til baka. Ég er einhverra hluta vegna ekki tilbúinn að kyngja þessu án umhugsunar. Það hljóta að vera hús í veði fyrir lánunum.

Trúir því einhver að vanskil á þessum lánum geti skekið viðskiptaheiminn líkt og verið hefur að undanförnu, ein sér, jafnvel svo að málsmetandi menn spá allsherjar heimskreppu?

Auglýsi hér með eftir einhverjum sem hefur lesið sér til um þetta, er hættur að vonast eftir greinargóðri úttekt frá íslenskum fjölmiðlum. Jafnvel Spegillinn á RUV hefur ekki enn tekið þetta mál til umfjöllunar en þar eru annars oft góðar fréttaskýringar.

Spá 30% hækkun á hlutabréfum

Ótrúleg endaleysa.

Þessi frétt mynnir mig á þegar maður var ungur og þeir fjörugustu í partýinu sögðu "það hlýtur að vera hægt að redda einni vodka enn" svona um það bil þegar partýgestirnir voru að tínast heim til sín að áliðnum morgni.

Þessi frétt hlýtur að eiga að vera grín! Hverslags fjölmiðill finnur hjá sér þörf til að senda frá sér frétt um að einhver spái 0,5% verðhækkun á markaði sem er ekki einu sinni búinn að opna, og það á þessum síðustu og verstu. Á sama tíma var íslenska vísitalan enn að falla, og örvæntingin á markaðnum að aukast.

Alveg ótrúlegar þessar takmarkalausu tilraunir allra sem hagsmuna hafa að gæta til að hysja brókardrusluna upp um blessað viðskiptalífið okkar.

Ágætu viðskiptablaðamenn, hvort heldur þið eruð á Viðskiptablaðinu, Frjálsri Verslun, MBL eða annarstaðar. Viljið þið drattast til að fara að færa okkur vitibornar fréttir af því sem raunverulega er  er að gerast á heimsmarkaðinum.

Eða eruð þið í sama flokki og þeir á greiningadeildunum? Hafið ekkert vit á þessu til að skýra út fyrir okkur hinum, hvert stefnir.

Útlit fyrir verðhækkun á Wall Street